ބޭސްފަރުވާއާއި ބެހޭގޮތުން ނޭނގޭ ބޮޑު ސިއްރުގެ ހަގީގަތް!
ހިދުމަތަކީ ސަރުކާރަކަށް ފެނިއްޖެނަމަ އެ ފެންނަ ގޮތަކަށް ކޮށްދޭ ކަމެކެވެ. އަސާސީ ހައްގަކީ އެ ހައްގު ކޮންމެހެންވެސް ސަރުކާރުގެ ހަރަދުގައި ފުރިހަމަޔަށް ދިނުމެވެ. މި ދެކަންތައް ރައްޔިތުންނަށް ވަނީ އޮޅިފައެވެ. ނުވަތަ ސަރުކާރުތަކުން ރައްޔިތުންގެ މަޖިލީހުން ވަނީ އޮޅުވާލާފައެވެ. މިސާލަކަށް؛ ކޭބަލްޓީވީ އަކީ ހިދުމަތެކެވެ. އޮންލައިންކޮށް އައިޑީކާޑަށް ފައިސާ ދެއްކުމަކީ ވެސް ހިދުމަތެކެވެ. ސްކޫލްތަކުގައި އައިސް ފެން ލިބޭނެ ގޮތް ހުރުމަކީ ހިދުމަތެކެވެ. މާނައަކީ މިކަންތައްތައް މިގޮތަށް ކޮށްދިނުން އެއީ ސަރުކާރަށް ލާޒިމް ވާނޭ ކަމެއް ނޫނެވެ. ހަމައެހެންމެ، ބޭސްފަރުވާ އަކީ ރައްޔިތުންނަށް ދޭންޖެހޭ އަސާސީ ހައްގެއް ކަމަށް ގާނޫނުއަސާސީގައި ލިޔެފައެއް ނޯވެއެވެ. އެމީހުން ލިޔެފައި އޮންނަނީ ބޭސްފަރުވާއަކީ ވެސް ހިދުމަތެއް ކަމަށެވެ. އަސާސީ ހައްގު ކަމަށް ލިޔުނުނަމަ، އެ ހައްގު އެންމެ ފުރިހަމަޔަށް ރައްޔިތުންނަށް ފޯރުކޮށްނުދީފިނަމަ ވެރިން ގޮވައިގެން ރައްޔިތުންނަށް ކޯޓަށް ދެވޭނެއެވެ.
ދިވެހިން އަދު ވަނީ ވެރިންގެ ވަކިތަކުތެރޭ އަޅުވެތިވެފައެވެ. ރައްޔިތުންގެ ހައްގުތަކާއި އަސާސީ ހިދުމަތް ތަކަކީ ކޮބައިކަން ރައްޔިތު މީހާ އަށް ވިސްނޭ
މިންވަރަށް ވުރެން ބޮޑަށް ރައްޔިތުމީހާ ވަނީ ވެރިންގެ އަޅުވެތި ކަމުގެ ކަސްތޮޅުތަކުން ކަސްތޮޅުއެޅި ރައްޔިތުންގެ ހައްގުތަކެއް އަސާސީ ހިދުމަތް ތަކެއ ވާކަން ހަނދުމަނެތި ގޮސްފައެވެ.
ސިއްހީ ހިދުމަތަކީ އަސާސީ ހިދުމަތެއް ކަމަށް ވެރިން ވިސްނާދިނަސް އެއީ ރައްޔިތުންނަށް ލިބިދޭން ޖެހޭ އަސާސީ ހައްގެކެވެ. ހިދުމަތެއް ނޫނެވެ. އަސާސީ ހައްގުތަކީ މަހުޖަނެއް ވިޔަސް ނުވަތަ ފަގީރެއް ކަމުގައި ވިޔަސް ލިއްބައިދޭންޖެހޭ ހައްގެކެވެ. އެ ހައްގު އަދާކޮށްދޭން ވެރިންގެ މައްޗަށް ލާޒިމެވެ. ސިއްހީ ހިދުމަތްތައް ތަރައްގީކޮށް އެ ހިދުމަތްތައް ފުރިހަމަ ކުރުން އެއީ ވެރިން ވާންޖެހޭ ވައުދެއް ނޫނެވެ. އެއީ ވެރިންގެ މައްޗައް ޝަރުއުކޮށް ރައްޔިތުންނަށް އަދާކޮށްދޭން ލާޒިމްވާ އަމާނާތެކެވެ.
ގާނޫނުއަސާސީގައި ބޭސްފަރުވާއަކީ ހިދުމަތެއް ކަމަށް އޮންނަ އޮތުން އިސްލާހުކޮށް، އެއީ ދައުލަތުން ކޮންމެ ރައްޔިތަކަށް ވެސް ފޯރުކޮށްދޭން ޖެހޭ އަސާސީ ހައްގެއްގެ ގޮތުގައި ލިޔެފިނަމަ، ހުރިހާ ރަށަކަށް ކޮލިޓީ ޑޮކްޓަރުންނާއި މެޝިނަރީޒްތަކާއި ޒަމާނީ ބޭސްތައް ހިލޭ ސާބަހަށް ރައްޔިތުންނަށް ފޯރުކޮށްދިނުމަށް ސަރުކާރަށް ލާޒިމް ވާނެ! މިހާރު މިއޮންނަނީ އެހެން އުސޫލެއް!
ބޭސްފަރުވާކުރުމުގެ ހައްގު ފުރިހަމަ އަށް އަދާކޮށްދެވޭތޯ ވެރިން ބަލާންޖެހޭ ހިނދު ވެރިންގެ ފަހަތުން ބޭސްފަރުވާ އަށް ސަލާންޖަހަން ރައްޔިތުން ދާންޖެހޭނަމަ އެ ފަދަ ވެރިން އެތިބީ ރައްޔިތުންގެ އެންމެ އަސާސީ ހައްގުތަކަށް އަރައިގަނެ އެ ފަދަ ހައްގުތަކުން ރައްޔިތުން މަހްރޫމް ކޮށްގެންނެވެ.
ވިސްނާލާށެވެ. ރާއްޖޭގެ ސިއްހީ ހިދުމަތް ދޭ ތަންތަނަކީ ރައްޔިތު މީހާގެ ހައްގު އަދާކޮށްދޭ އަދި ފުރިހަމަ ފަރުވާދެވޭ ތަންތަން ތޯ އަމިއްލަ ނަފްސާއި ސުވާލު ކުރާ ހިނދު ސިއްހީ ދާއިރާ އަށް ރައްޔިތުންގެ އިތުބާރު ވަނީ ގެއްލިފައެވެ. ކުޑަމިނުން ގެންގުޅޭ ބޭސްފަދަ ތަކެއްޗަކީ އެންމެ ދަށް ފަންތީގެ ބޭސް ކަމާއި މެދު ސުވާލު އުފެދެއެވެ.
އަހަރަކު އެއްްތައް ފުރާނައެއް މިދުނިޔެ އާއި އަލްވަދާއު ކިޔަނީ ސިއްހީ ދާއިރާއިން ވާ އިހުމާލް ތަކުގެ ސަބަބަުންނެވެ.
ލޯބިވާ ތުއްތުދަރިފުޅާއި އަނބިމީހާ ވަކިވެ ދިއުމަކީ އެެއްވެސް މީހަކު އެދޭނެ ކަމަކަށް ނުވިޔަސް ސިއްހީ ދާއިރާގެ ފަރުވާކުޑަކަމުން މިފަދަ ހިތްދަތި އެތައް ތަޖްރިބާ ތަކެއް ރައްޔިތުން ކުރުން އެއީ ވެރިން ގެ ވާޖިބު އަދާ ނުކުރާ ކަމުގެ ދަލީލެކެވެ.
